Rhoi ein canlyniadau gorau erioed ar waith

Cyhoeddi perfformiad gorau erioed

Mae Cymdeithas Adeiladu Principality wedi cyhoeddi perfformiad gorau erioed ar gyfer y flwyddyn a ddaeth i ben ar 31 Rhagfyr, 2023. Ar adeg cythryblus yn economaidd, gwnaeth y Gymdeithas gynnydd amlwg tuag at ei gweledigaeth strategol gan helpu mwy o brynwyr tro cyntaf nag erioed o’r blaen; cynyddu ei llyfr morgeisi i’r lefelau uchaf erioed a chynorthwyo mwy o gwsmeriaid i ddechrau arfer cynilo.
 

Pwysleisiodd Julie-Ann Haines, Prif Swyddog Gweithredol Cymdeithas Adeiladu Principality, ddiben craidd y Gymdeithas: “Fel cymdeithas adeiladu, rydym yn canolbwyntio ar helpu mwy o bobl i gael lle i’w alw’n gartref a chreu cymdeithas o gynilwyr, ac eleni rydym wedi helpu mwy o berchnogion tai a chynilwyr nag erioed o’r blaen. Rydym hefyd yn falch o ymrwymo hyd at 3% o’n helw i gael effaith gadarnhaol ar lesiant y cymunedau rydym yn eu gwasanaethu.”
 

Gwell cartrefi, dyfodol sicr, cymdeithas decach

Parhaodd Julie-Ann, “Mae effeithiau economi anwadal, gyda chwyddiant a chyfraddau llog yn parhau’n uwch na’r hyn a welsom yn ddiweddar, wedi effeithio ar gyllid personol ein haelodau, gan gyfyngu ar ddyheadau’r rhai sy’n cynilo ar gyfer y dyfodol a’i gwneud yn anoddach i bobl gamu ar yr ysgol dai. Yn 2023 bu ein set gref o ganlyniadau yn gymorth i’r nifer uchaf erioed o brynwyr tro cyntaf, gan gynyddu i 8,134 yn 2023 o 4,587 yn 2022 a chynyddwyd nifer y cartrefi sy’n eiddo i aelodau i 80,883, i fyny o 75,425 yn 2022. Rydym wedi helpu mwy o bobl i gynilo'n rheolaidd ac yn gyson wedi cynnig cyfraddau cynilo sy'n uwch na chyfartaledd y farchnad ar 2.94% o gymharu â chyfartaledd y stryd fawr1 o 2.31%. Rydym hefyd wedi canolbwyntio ar gwtogi’r amser y mae’n ei gymryd i ni drosglwyddo codiadau cyfradd llog, gan ostwng o 30 diwrnod i 15, fel bod cwsmeriaid yn elwa’n gyflymach.”
 

Mae Principality yn parhau i roi aelodau wrth galon ei strategaeth, gan gynyddu buddsoddiad er mwyn sicrhau ei bod yn darparu gwasanaeth blaenllaw yn y diwydiant. O ganlyniad, mae ei Sgôr Hyrwyddwr Net (NPS) arobryn wedi gwella ymhellach yn 2023 i 83.9 ac fe’i pleidleisiwyd yn Gymdeithas Adeiladu Orau ar gyfer Gwasanaeth Cwsmeriaid gan ‘What Mortgage’ am y chweched flwyddyn yn olynol.

Ymrwymiad cymunedol

Mae ymroddiad diwyro Principality i'w chwsmeriaid yn cael ei ymgorffori ymhellach gan ei buddsoddiad parhaus mewn cymunedau lleol. Tra bod banciau a chymdeithasau adeiladu eraill wedi cilio o’r Stryd Fawr, mae Principality yn cynnal presenoldeb cadarn, gyda 53 o ganghennau a 15 o asiantaethau ledled Cymru a’r gororau, ac mae wedi ailddatgan ei hymrwymiad i weithredu wrth galon cymunedau lleol tan o leiaf ddiwedd 2025.
 

Buddsoddodd Principality £1.3m mewn gwaith effaith drwy ei Chronfa Cenedlaethau’r Dyfodol, gan gynyddu ei chefnogaeth i grwpiau ieuenctid a chymunedol, ymestyn partneriaethau gyda sefydliadau elusennol, a chymryd camau breision tuag at gyflawni ei gweithrediadau carbon net-sero erbyn 2040, gan leihau ei hôl troed carbon 2,700 tunnell CO2e.

Uchafbwyntiau perfformiad

Cododd elw llog net i 1.52% yn 2023 (ffigur 2022: 1.39%) wedi’i ysgogi gan gyfradd sylfaenol uwch Banc Lloegr. O ganlyniad, nododd Principality elw cyn treth sylfaenol o £60.3m yn 2023, cynnydd o £43.5m yn 2022.
 

Tyfodd Principality ei llyfr morgais manwerthu £1.1bn i £9.3bn (ffigur 2022: £8.2bn) gan ddangos newid sylweddol tuag at ei chynlluniau twf uchelgeisiol. Mae’r busnes yn elwa ar fuddsoddiad a wnaed mewn blynyddoedd blaenorol ar draws ei lwyfannau morgeisi, er mwyn parhau i feithrin cydnerthedd a’r gallu i addasu yn ystod ansicrwydd economaidd.
 

Cododd balansau cynilion £1.0bn yn 2023 i £9.1bn (ffigur 2022: £8.1bn). Cododd y llyfr benthyca benthyciadau masnachol hefyd £49m i gyfanswm o £811m, o ganlyniad i’w gytundeb nodedig gyda Grŵp Pobl2, a chefnogodd Principality fwy o Gymdeithasau Tai a chleientiaid Masnachol drwy gyfnod heriol.
 

Dywedodd Julie-Ann Haines i gloi, “Wrth edrych ymlaen, rwy’n hyderus yng ngallu Principality i lywio amodau gwleidyddol ac economaidd heriol. Er ein bod yn rhagweld y bydd cyfnodau o newid parhaus, mae ein busnes mewn sefyllfa dda i fuddsoddi ymhellach a thyfu er budd ein haelodau, ein cydweithwyr a’n cymunedau. Rydym yn parhau i fod yn ymroddedig i gefnogi dyheadau perchentyaeth ein haelodau, darparu cynnyrch cynilo cystadleuol a gwneud gwahaniaeth ystyrlon yn y cymunedau rydym yn eu gwasanaethu. Wrth i ni lywio’r dirwedd esblygol, byddwn yn parhau i addasu ac arloesi i ddiwallu anghenion cyfnewidiol ein haelodau, gan aros yn driw i’n gwerthoedd a’n diben craidd.”

Mae canlyniadau diwedd blwyddyn Cymdeithas Adeiladu Principality yn tystio i’w diogelwch, ei sefydlogrwydd, ei chydnerthedd a’i hymrwymiad diwyro i’w haelodau a’i chymunedau, gan osod y Gymdeithas mewn sefyllfa i barhau i lwyddo yn y blynyddoedd i ddod.

Pwyntiau Allweddol

• Cyfanswm asedau: £12.5bn (2022: £11.3bn) 
• Elw sylfaenol cyn treth: £60.3m (2022: £43.5m) 
• Balansau morgeisi manwerthu £9.3bn (2022: £8.2bn) 
• Balansau cynilion: £9.1bn (2022: £8.1bn) 
• Cyfalaf (cymhareb CET1): 21.8% (2022: 26.5%) 
• Sgôr Hyrwyddwr Net: 83.9 (2022: 81.6) 

Nodiadau

1. CSDB CACI, Stoc, Cyfradd Llog Cyfartalog Pwysol ar gyfer Rhagfyr 2022 - Tachwedd 2023.